Plantun de Prouvènço

Pèr coumpara dos planto d'encò nostre

Fumana ericifolia & Panicum barbipulvinatum

Fumana ericifolia

Cistaceae

Noms en français : Fumana à feuilles de bruyère, Fumana des montagnes.

Descripcioun :
Aquesto massugueto, proun coumuno trachis sus li relarg secarous de garrigo. Ei pas la souleto à faire de flour jauno, pèr acò fau regarda se i'a d'estipulo à la baso di fueio. Aqui n'i'a ges. Pièi Fumana ericifolia a de pecou pulèu long (>5 mm) au contro de Fumana procumbens (<5 mm). Pamens ço que permés de bèn li destria, èi qu'eici, aquéli pecou reston après la cabussado dóu fru (fotò).

Usanço :
Dins d'ùni relarg, es utilisado pèr ana pissa.

Port : Pichoto planto lignouso
Taio : 5 à 40 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Fumana
Famiho : Cistaceae

Ordre : Malvales

Coulour de la flour : Jauno
Petalo : 5
Ø (o loungour) flour : 6 à 9 mm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Mai à jun

Liò : Tepiero seco - Garrigo - Roucaio - Paret
Estànci : Termoumediterran à Coulinen
Couroulougi : Estenoumediterrano
Ref. sc. : Fumana ericifolia Wallr., 1840 (= Fumana ericoides subsp. montana (Pomel) Güemes & Muñoz Garm. )

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.